تبریز امروز:
علیکم‌السلام! شهریار آغا،
چوخدان‌دی قاچمیشدین بیزدن اوزاغا،
آیاق باسمازیدین بیزیم قوناغا،
جاوان‌لیق دؤوروندن بو چاغا دئین،
سن هئچ بیزدن بئله یاد ائتمزیدین،
نه اولدو آی اوغول سن بیر‌دن‌بیره؟
اونوتدوقون ائلی سالدین خاطیره!
چاغلایان سولارا، اسن یئل‌لره
بو قوجا حیدره ائیله‌دین سلام
لوطفون آرتیق اولسون علیک‌السلام!
نه قدر دادلی‌میش سنین بو دیلین
ایشیدن کیمی بو سسینی ائلین
قوجا، جاوان، اوشاق، قیز-گلین
سنی دینله‌مگه قاچدیلار چؤله
آنام قوربان اولسون بو شیرین دیله.
فارس قیزلاری آزدیرمیشدی عملین؟
کی، فار‌سجایدی بۆتون شعرین-قزلی،
حیدر بابا یوردوندا بیر گؤزلین
ایشگین‌نه بیر قلم قوی‌مازدین بئله!
فارسجا یازماقدان دویمازدین بئله.
تهران گؤزل‌لری یولون کج ائتدی
کؤنلونو آپاریب سنی گیج ائتدی
ده گؤروم یا فلک سنله لج ائتدی؟
دؤنگه وارمیش، دؤنوم وارمیش بیلمه‌دین
آیری‌لیق وار، اؤلوم وارمیش بیلمه‌دین،
ایندی بیزی تازه گلیب تاپیرسان
کؤنلوموزه کؤزلر قویوب یاخیرسان
حسرت ایله کئچن‌لره باخیرسان
گؤرورسون کی، سولار آخیب گئدیرمیش
دوغولان قوجالیب، اؤلوب، ایتیرمیش.
چوخدا وئرمه، سیخینتی اؤز کؤنلونه
مهریبان‌دیر هر آتا اؤز اوغلونه
قاییتمیشان ایندی سن اؤز یولونا
بویور‌غیلن گؤز اوستونده یئرین وار
ائلین سنی سئوینج ایله قارشیلار.
سلام ائلر بۆتون ائلیمیز سنه
باغچامیز، باغیمیز، گۆلوموز سنه
اوزون مۆدّت سوسان دیلیمیز سنه
ده گؤرک دئمه‌لی داها نه‌یین وار
افسوس کی، سن گئج دیل آچدین شهریار!
کیچیک اوشاق تازه سؤزه گلنده
آیری بیر دادلی‌لیق اولار دیلینده
لذّتی وار آغلایاندا، گۆلنده
ایندی کی، دیل آچدین سوسما، آغلا-گۆل
یامان سؤیله، یاخشی سؤیله، داغلا گۆل!
.jpg)
جبار باغچه بان
