تبریز امروز:
خيال چشم مست ياريلن دل مئی پرست اولدو،
وئرين طفلان مکتب مژده، کيم ديوانه مست اولدو.
بساط عشقه چون قويدوم قدم اوّلکی منزلده،
اليمدن شيشه ی ايمان [و] دين دوشدو شکست اولدو.
نه دندير بيلميرم آهیم اودو يارا نشست ائتمز،
و حال آن که نئجه داش قلب اولا يئتدی، نشست اولدو؟
دئيه رديم وصله يئتسم، ائيله رم اؤز درديمه درمان،
يئتيب پروانه تک ياندیم، شکستيم ياخشی بست اولدو.
کمند آهی چوخ آهو دالینجان آتدیم آخرده،
بِحمدالله شکاريم بير غزال شير مست اولدو.
وئريب سربست ليک فرمانی کلاً اختيار ائتديم،
اۏ گوندن کيم کؤنول زنجير عشقه پای بست اولدو.
گؤزوم، افتاده اول، گر چشمه سار فيضه طالبسن،
نئچون قالماز سوسوز عالمده هر بير يئر کی پست اولدو.
او صرّافی کيم ائتميشدی مسخّر عالمی ديلده،
گئديب دل بيلمه ين دلدارا ايمدی زيردست اولدو.
